Glútenlaust, Grænmetisréttir

Kúrbíts pitsa

17. April, 2015
DSC_0195

Ég hef óskaplega gaman að því að bæði lesa og fara á fyrirlestra um heilsutengd málefni. Það sem mér finnst allir vera sammála um, er að við þurfum að borða töluvert mikið af grænmeti. Nú gæti einhver haldið að ég ætlaði að fara að fræða og predika um mataræði og ég teldi mig vera einhvern heilsugúrú. Það ætla ég ekki að gera og það er mjög langur vegur frá því að ég sé gúrú. Er “bara„ venjuleg húsmóðir.  Þó reyni ég að borða það sem ég tel hollt og mér finnst gott.

Ein leið til að fá vel af grænmeti í einni máltíð er að skella í kúrbíts pitsu. Það er ekki bara að hún sé stútfull af grænmeti, mér finnst hún líka virkilega góð. Hrafntinna litla barnabarnið okkar 17 mánaða gerði ptisunni líka góð skil.

Ef einhver afgangur verður af pitsunni er um að gera að skella henni í nestisboxið og taka með í vinnuna daginn eftir.

Kúrbíts pitsa

Áætlað fyrir fjóra fullorðna.

Hitið ofninn í 200°C

DSC_0156

Innihald í botninn:

  • 2 stk. kúrbítur.
  • 1 stk. egg.
  • 200 g rifinn ostur.
    • Ég notaði rifinn mozzarella ost.
  • 1 bolli hveitikím.

DSC_0170

Aðferð:

  • Notið frekar stóra skál.
  • Rífið niður kúrbítinn með rifjárni.
  • Bætið egginu, ostinum og hveitikíminu saman við.
  • Hnoðið öllu saman með höndunum.
  • Klæðið ofnplötu með smjörpappír.
  • Þjappið blöndunni á ofnplötuna.
  • Bakið við 200°C í 20 mínútur.

DSC_0184

Næsta skref  er þegar botninn er bakaður.

Ofan á pitsuna

Ég  nota að þessu sinni tómat og basiliku pestóið sem ég hef áður verið með í blogginu en þá ofan á brauð.

 Tómat og basilikupestó

Innihald:

  • 1 bolli sólþurrkaðir tómatar.
  • 1 bolli fersk basilika.
  • ½ stk rautt chili.
  • 1 stk geiralaus hvítlaukur.
  • 4 msk möndlur.
  • Flögu salt og pipar.
  • Ólívuolía eftir þörfum.

Aðferð:

  • Setjið allt hráefnið í matvinnsluvélina nema ólífuolíuna.
    • Byrjið að mauka.
  • Bætið olíunni smátt og smátt út í og látið vélina ganga.
    • Magnið af olíunni fer eftir því hversu þykkt þið viljið hafa pestóið.

Smekksatriði er hversu gróft fólk vill hafa pestóið.  Mér finnst gott að hafa hneturnar svolítið grófar.

 Þegar botninn er bakaður smyrjið þá pestóinu jafnt yfir hann og raðið álegginu á.

DSC_0188

Áleggið sem ég notað:

  • 1 askja steiktir sveppir.
  • Nokkrar sneiðar hráskinka.
  • Hægelduð paprika.
    • Uppskriftin er á blogginu undir speltbrauði og bollur.
  • 100 g rifinn mozzarella ostur.
  • ½ rauðlaukur
  • Notið endilega bara það sem ykkur líkar best.

Raðað á botninn og bakað áfram í 10 mínútur.

Þegar pitsan var bökuð dreifði ég yfir hana ¼ úr öskju af brokkóli/smára spírum.

Áferðin á kúrbíts pitsunni er allt önnur en á brauð pitsu. Botninn er frekar mjúkur en ofboðslega góður.

DSC_0195

Með pitsunni hafði ég ofnbakaðar franskar úr sætum kartöflum.

Ofnbakaðar sætar kartöflur

Ég miða við ½ sæta kartöflu á mann fyrir fjölskylduna mína. Við erum sjúk í sætar. Þið þekkið ykkar heimafólk með magn.

  • Skerið sætu kartöflurnar í strimla.
    • Ég hef hýðið á.
  • Dreifið jafnt yfir ofnskúffu.
  • Bakið við 200°C í ca 50 mínútur.
  • Þegar kartöflurnar er tilbúnar hellið ólívuolíu yfir þær og saltið með flögusalti.

DSC_0200

Fólkið mitt vill nánast  sósu með  öllu.

Köld hvítlauks sósa

Innihald:

  •  1 dós sýrður rjómi.
  • 2 stk hvítlauks rif
  • 1- 2 tsk. akasíu hunang
  • salt og pipar.
  • Hrærið öllu saman.

Mér finnst mjög gott að útbúa sósuna áður en ég byrja á pitsunni og læt ég hana þá standa á borðinu þar til við borðum.

Njótið.

Athugasemdir

athugasemdir

You Might Also Like