Kjúklingur, Meðlæti, Ýmislegt

Ólívu kjúklingur með krydd kartöflumús

12. September, 2015
DSC_0121

Það var rigning og hífandi rok úti í vikunni þegar ég var að undirbúa kjúklingaréttinn. Ég ætlaði að nota töluvert af kryddjurtum í réttinn, en þær voru úti í garði. Ég velti fyrir mér að gera bara eitthvað annað við kjúklingalærin. Ætlaði ekki að nenna út í garð í þessu veðri að sækja mér kryddjurtir. Ég herti þó upp hugann klæddi mig í regnúlpu og stígvél og hélt niðurlút til að koma í veg fyrir að maskarinn renni út á kinnar út í garð vopnuð skærum og sigti. Ég horfði í kringum mig og sá að reyniberin lágu á jörðinni, höfðu ekki þolað rokið og rigninguna sem buldi á okkur nóttina áður. Mér fannst það frekar leitt vegna fuglanna okkar sem koma í hópum á haustin og gæða sér á þeim.

Þar sem ég bogra yfir kryddinu mínu með rassinn upp í vindinn og klippti það sem ég þurfti á að halda, fannst mér þessi réttur eitthvað svo mikill haustmatur. Nú hugsar sjálfsagt einhver. Hvernig geta ólívur, sólþurrkaðir, sítróna, hvítlaukur og kryddjurtir verið eitthvað haust? Ég bara veit það ekki en mér finnst það eitthvað svo notalegt að vera inni í hlýju eldhúsinu að elda góðan mat, þegar rigningin og rokið lemja húsið að utan.

Ofnbökuð ólívu kjúklingalæri

Þegar ég er með kjúklingalæri í matinn, miða ég við tvö læri á okkur konurnar í fjölskyldunni, þrjú á karlana, eitt á tveggja ára barnið og tvö til þrjú á unglingana. 

DSC_0052

Innihald:

  • 10 stk. kjúklingalæri með beini.
  • 3 msk. ólívuolía.
  • 1 msk. smjör.
  • 6 stk. tómatar.
  • 4 stk hvítlauksrif.
  •  2 msk. timjan.
  • 2 msk. salvíulauf.
  • 2 msk majoram.
    • Ég notaði tilbúið krydd.
  • 100 g steinlausar svartar ólívur.
  • Safi úr 1 sítrónu.
  • ½ bolli basilikulauf.
  • Salt og pipar.
    • Ég nota alltaf flögusalt.
  • 2 ½ dl. hvítvín.

Ég notaði kryddjurtir úr garðinum, ef þig eigið ekki fersk krydd, notið þá þurrkuð, ef ykkur líkar ekki eitthvað að þessum kryddum sleppið þeim þá og bætið við meira af þeim sem ykkur líkar.

Aðferð:

  • Hitið olíuna og smjörið saman við lágan hita á pönnu.
  • Steikið kjúklingalærin þar til þau hafa fengið fallegan lit.
    • Tekur ca 15 mínútur, 7 – 8 mínútur á hlið.
      • Ég steikti fimm og fimm í einu.
  • Takið lærin af pönnunni og setjið í eldfast form.
  • Saltið og piprið.
  • Hellið víninu á pönnuna og látið það sjóða niður að mestu.
    • Tekur ca 5 mínútur.

Á meðan vínið er að sjóða niður.

DSC_0068

 

  • Skerið tómatana niður í litla bita.
    • Skerið þá fyrst í tvennt síðan þvert á (í sneiðar)og að síðustu langs (litlir bitar).
  • Saxið hvítlaukinn, tímjanið og salvíuna smátt niður.
  • Bætið tómötunum, hvítlauknum, salvíunni og tímjaninu á pönnuna og blandið vel saman.
  • Látið malla í ca 15  mínútur.
    • Þá hefur það þykknað aðeins.
  • Hellið yfir kjúklinginn.
  • Setjið inn í 180°C heitan ofn og bakið í 25 mín.
  • Takið þá formið út.
  • Blandið saman 2 msk af ólívuolíu, ólívum, sítrónusafa, basilíku og  majoram.
  • Hellið yfir kjúklinginn.
  • Bakið áfram í  ca. 5 mínútur.

DSC_0121

Kartöflumús

Með ólívum, sólþurrkuðum tómötum, graslauk og fetaosti.

DSC_0097

Innihald:

  • 1 kg kartöflur.
    • Ég notaði nýjar lífrænar.
  • 100 g smjör.
  • 1 bolli svartar steinlausar ólívur.
  • ½ bolli sólþurrkaðir tómatar.
  • ½ krukka fetaostur í olíu.
  • Knippi af graslauk.
  • Salt og pipar.

Aðferð:

  • Sjóðið kartöflurnar.

Ef notaðar eru lífrænar þarf að passa upp á að sjóða þær alls ekki of lengi. Ef það er gert þá fara þær í mauk. Þegar suðan er komin upp, takið þá lokið af pottinum og lækkið hitann. Suðutíminn fer eftir stærð kartaflanna. Að þessu sinni var ég með stórar og sauð þær við vægan hita í fimmtán mínútur.

  • Takið helminginn af ólívunum og maukið þær.
    • T.d. með töfrasprota eða í matvinnsluvél.
  • Skerið restina í tvennt.
  • Klippið sólþurrkuðu niður í ræmur.
  • Klippið graslaukinn niður.

Ég nota hrærivélina til að útbúa músina. Ef þið viljið skreyta hana geymið nokkrar ólívur og graslauk til að dreifa yfir hana.

  • Þegar kartöflurnar eru soðnar setjið eina og eina í hrærivélaskáina og hrærið.
    • Ég nota flata hrærivélaáhaldið.

Alltaf nema í þetta eina  sinn geri ég músina með hýðinu. Það kemur ótrúlega illa út á mynd og því flysjaði ég  þær.

  • Bætið smjörinu og ólívumaukinu saman  við.
  • Síðan sólþurrkuðu tómötunum, ólívunum og graslauknum.
  • Að síðustu fetaostinum.
  • Saltið og piprið.
    • Gætið að saltinu þar sem bæði ólívurnar og fetaosturinn er salt.
  • Ég hef músina frekar grófa.

DSC_0114

Njótið.

Athugasemdir

athugasemdir

You Might Also Like