Súpur, Ýmislegt

Súpa með gulrótum, sætum kartöflum og linsubaunum

20. January, 2015
Supa i skal
surdeigsbraud

Brauðin góðu.

Súrdeigsbrauð finnast mér bæði góð og falleg. Mig langaði mikið til að geta bakað þau sjálf.  En það verður að segjast eins og er að í nokkuð mörg ár hef ég reynt það með misjafnlega misheppnuðum árangri. Ég get ekki einu sinni talið upp allt sem hefur farið úrskeiðis hjá mér.

Bíddu nú við ert þú að fara að gefa uppskrift af misheppnuðu súrdeigsbrauði? Gæti einhver spurt. Nei það ætla ég ekki að gera. En um daginn fór ég á námskeið í gerð súrdeigsbrauða og er byrjuð að æfa mig á fullu. Það hefur bara gengið ágætlega að baka súrdeigsbrauð eftir námskeiðið og ég trúi því að ef ég held áfram að æfa mig verði ég örugglega súrdeigsbrauðmeistari.

Ástæða þess að ég er að segja ykkur frá súrdeigsreynslu minni er að eftir námskeiðið, kom ég heim með súrdeig í nokkur brauð og bakaði þessi líka fínu súrdeigsbrauð. Og hvað er það fyrsta sem manni dettur í hug að hafa í matinn þegar til eru bæði góð og falleg brauð? Auðvitað er það SÚPA!

Nú er komið að Súpunni.

Fyrst þegar ég heyrði talað um súpu úr gulrótum, sætum kartöflum og linsubaunum var ekki það fyrsta sem kom upp í huga mér að  mig langaði í hana, þrátt fyrir að vera mikið fyrir bæði gulrætur og sætar kartöflur. Það var ekki fyrr en ég fór út að borða með vinkonum mínum, sem ég verð að taka fram að eru miklir sælkerar að ég pantaði mér svona súpu.  Þær höfðu allar pantað sér þessa súpu , sem mér fannst ekki sérstaklega gott val hjá þeim. En þar sem þær hvöttu mig eindregið að gera slíkt hið sama, lét ég auðvitað tilleiðast.

Það verður að segjast eins og er að ég féll kylliflöt fyrir súpunni. Í fyrsta lagi fannst mér  súpan ofboðslega falleg, sem mér finnst skipta miklu máli og eftir fyrstu skeiðina varð þetta ein af mínum uppáhalds súpum. Þar sem maður getur ekki alltaf verið úti að borða, fór ég að reyna fyrir mér með sambærilega súpu. Eftir nokkrar tilraunir var það þessi súpa sem stóð upp úr hjá fjölskyldunni.

IMG_1741[1]

Grænmetissúpa uppskrift

Graenmeti

Innihald:

  • 2 msk. ólífuolía.
  • 1 laukur,  saxaður.
  • 1 tsk. karrý.
  • 4 hvítlauksrif, marin.
  • 5 cm fersk engiferrót.
  • 300 g gulrætur
  • 300 g sæt kartafla
  • 1/2 dl rauðar linsubaunir
  • 1 lítri grænmetissoð; vatn + 2 msk, grænmetiskraftur. Ég nota lífrænan.
  • 1 dós kókosmjólk.
  • Salt og grófmalaður pipar.

Aðferð

  • Saxið laukinn og hvítlaukinn gróft niður.
  • Rífið engiferið.
    • Ég nota rifjárn við það.
  • Ólífuolía og karrý hituð í potti við lágan hita, tilbúið þegar karrýið fer aðeins að brúnast.
  • Bætið við gróft skornum gulrótum, sætum kartöflum, engiferi og  linsubaunum.
  • Mýkið í olíunni í ca 2 mínútur.
  • Bætið vatninu og grænmetiskraftinum við.
  • Látið malla við vægan hita í 40 mínútur.
  • Maukið súpuna í matvinnsluvél eða með töfrasprota.
  • Bætið kókosmjólkinni út í og hitið upp að suðu.
  • Ef einhverjum líkar ekki kókosmjólk er að sjálfsögðu hægt að nota rjóma.
  • Hrærið í á meðan.

Þegar ég nota töfrasprota beint í pottinn vill skvettast í allar áttir. Mér finnst ég hafa fundið nokkuð gott ráð.  Ég set pottinn í vaskinn og mauka áhyggjulaus. Þarf þá ekki að þrífa allt í kring.

Meðlæti að eigin vali:

  • Sýrður rjómi
  • Ristuð graskersfræ.
  • Ristaðar kókosflögur.
  • Klettasalat.
  • Graslaukur.

Mér finnst ótrúlega smart að setja meðlætið í litlar skálar.

Fyrst þegar ég fór að gera þessa súpu var ég alltaf með sýrðan rjóma og ristuð graskersfræ. Einhverju sinni fannst mér ég ætti endilega að prófa að  hafa ristaðar kókosflögur með. Það smellpassaði.

Þeir sem eru með graslauk í garðinum hjá sér ættu endilega að klippa hann niður og hafa hann með.

Veljið það sem ykkur líkar best eða þið eigið í skápunum. Mér finnst samt ómissandi að hafa sýrðan rjóma með súpunni.

Stráið yfir súpuna því sem ykkur þykir best.

Supa i skal

Gæðið ykkur á súpunni ásamt  góðu brauði.

 

Athugasemdir

athugasemdir

You Might Also Like