Sumir réttir eru bara mest uppáhalds. Þessi laxaréttur er í þeim flokki hjá mér og minni fjölskyldu. Ég býð upp á hann við öll möguleg tækifæri og nú í nokkur ár hef ég haft hann á, má segja það í október? það hlýtur að vera í lagi, á annan í jólum. Ef ég er beðin um uppskrift af einhverju sem er bæði mjög gott og auðvelt, gef ég án undantekninga þessa laxa uppskrift. Sumir segja jafnvel að þeir geti ekki haft þennan rétt því þeir borði ekki gráðost. En trúið mér hvort sem fólk borðar alla jafna gráðost eða ei, hefur laxinn þótt ótrúlega góður. Ég luma á nokkrum slíkum sögum.
Rétturinn varð til fyrir mörgum árum hjá mér. Ég var með matarboð þar sem ég bauð upp á kjúklingabringur með gráðosti og döðlum. Þegar ég var langt komin með eldamennskuna og stutt í að gestirnir komi, rann það upp fyrir mér að ég hafði ekki gert ráð fyrir mat fyrir mágkonu mína. En hún borðar ekki kjöt. Hvernig gat ég gleymt henni, sérstaklega þar sem hún er mín uppáhalds mágkona. Í smá stressi fór ég að hugsa um hvað ég ætti að bjóða henni upp á. Ekki gat ég látið hana borða eingöngu meðlæti, þó svo að það væri líka mjög gott. Ég rauk með það sama út í næstu búð og keypti það fyrsta sem ég rak augun í, laxaflak. Þegar heim kom, var eina sem mér datt í hug að gera var að smyrja ostinum sem ég notaði á kjúklingabringurnar yfir laxinn. Ég krossaði fingur og vonaði að þetta væri a.m.k. ágætt. En til að gera langa sögu stutta var nánast slegist um laxinn. Hann þótti miklu betri en kjúklingabringurnar. Þegar ég hugsa mig vel um, held ég bara að kjúklingabringurnar hafi ekki verið eldaðar aftur með gráðostinum. En laxinn aftur á móti aftur og aftur og aftur.
Lax með gráðosti og döðlum
Áætlað fyrir fimm til sex manns
Innihald:
- Laxaflak.
- Ég var með 800 gr. flak
- Sítrónupipar
- 1 askja gráðostur.
- 10 stk. lífrænar döðlur.
Aðferð:
- Skerið laxaflakið niður í hæfilegar sneiðar.
- Setjið hann í ofnskúffu.
- Gott að hafa bökunarpappír í ofnskúffunni.
- Piprið.
- Skerið eða klippið döðlurnar niður í sneiðar.
- Hrærið saman gráðostinum og döðlunum.
- Smyrjið jafnt yfir laxinn.
- Bakið við 200°C í 18 mínútur.
Sinneps – hunangs bakaðar kartöflur
Ég miða við ½ kartöflu á mann.
Kartöflurnar finnst mér passa vel með laxi og lamba- og nautakjöti.
Innihald:
- 3 stk. bökunarkartöflur.
- 1 kúfuð msk. Dijon sinnep.
- 1 kúfuð msk. akasíuhunang.
- Flögusalt.
Aðferð:
- Þvoið kartöflurnar vel.
- Skerið eftir endilöngu,
- Skerið frekar þéttar grunnar rákir í hýðið.
- Raðið kartöflunum á ofnplötu með sárið niður.
- Best að hafa smjörpappír á plötunni.
- Blandið saman sinnepinu og hunanginu.
- Smyrjið því yfir kartöflurnar.
- Saltið t.d. með maldon salti.
- Bakið við 200°C í 55 – 60 mínútur.
Köld sinnepssósa
Innihald:
- 1 dós sýrður rjómi.
- Ég nota 10%.
- 2 tsk dijon sinnep.
- 1 tsk akasíu hunang.
- Flögu salt og pipar.
Aðferð:
- Setjið allt saman í skál og hrærið saman.
Mér finnst best að útbúa sósuna a.m.k. klukkustund áður en ég ber hana á borð.
Mangó salat
Innihald:
- 1 stk. mangó.
- ½ rautt chili.
- 4 tsk. rifinn engifer.
- 4 msk. balsamic edik.
- 4 msk. sesamolía.
Aðferð:
- Skerið mangóið í bita.
- Skerið chilíið smátt niður.
- Setjið í skál.
- Hrærið saman edikinu, olíunni og engiferinu.
- Hellið yfir salatið.
Njótið.
