Eftirréttir / Kökur, Glútenlaust

Lime skyrkaka með hvítu súkkulaði

12. February, 2017
DSC_0834

Við erum nokkrar vinkonur og fyrrum samstarfskonur sem hittumst mánaðarlega heima hjá hver annarri. Við köllum þetta prjónahitting. Við erum allar mjög fjölhæfar, því við getum prjónað, talað og talað og talað og borðað. Auðvitað prjónum við ekki á meðan við gæðum okkur veitingunum. Allar þessar vinkonur mínar útbúa súper góðan mat og kökur. Ég hlakka til prjónahittingsins allan mánuðinn. Í hvert skipti læri ég eitthvað nýtt hvort sem það er í prjónaskap eða matargerð. Um daginn vorum við hjá einni galdrakonunni í Grafarvoginum. Með kaffinu hafði hún m.a. þessa dýrindis skyrköku. Við vinkonurnar áttum frekar erfitt með að hemja okkur. Auðvitað báðum við um uppskrift. Þetta er svo sem engin uppskrift sagði gestgjafinn enda nota ég aldrei uppskriftir sagði hún. Nema einstaka sinnum nota ég uppskriftir frá þér. 😉 Við vinkonurnar vorum frekar ágengar og hættum ekki fyrr en við fengum uppgefið hvað væri í kökunni. Jú hún gaf okkur það upp og hlutföllin voru dass að þessu og dass af pálmasykri og pínu af þessu. Heim fór ég með þessar upplýsingar og prófaði mig áfram. Nokkrum sinnum já hittingurinn var í janúar er ég búin að búa til skyrkökuna, fjölskyldan er sjúk í hana. Í gærdag útbjó ég skyrkökuna fyrir bloggið, ætlaði síðan að taka mynd af henni í dag á tertudiski. Hafði hana í eftirmat um kvöldið handa fjölskyldunni, við erum jú þrjú follorðin. En það er engin mynd.

 

Lime skyrkaka með hvítu súkkulaði

DSC_0815

Innihald:

  • 1  Lítil dós af vanilluskyri.
  • 250 ml rjómi.
  • 2 msk. pálmasykur.
  • 3 dl. músli 
    • Hægt að nota hafrakex, súkkulaðikex, kanilkex eða……..
  • 1 msk. kókosolía.
  • 2 stk. líme.
  • 100 gr. hvítt súkkulaði.

Aðferð:

  • Léttþeytið rjómann.
    • Lesið hér að neðan hvernig ég geri það.
  • Blandið skyrinu, safanum úr 1½ lime  og pálmasykrinum saman við rjómann.
    • Blandið varlega saman með sleif eða sleikju
  • Blandið saman í skál múslíinu og kókosolíunni (bræðið kókosolíuna) og setjið í botninn á forminu.
    • Kreystið safa úr ½ lime yfir botninn.
  • Dreifið skyrblöndunni yfir botninn.
  • Bræðið hvítt súkkulaði yfir vatnsbaði.
  • Látið aðeins rjúka úr því áður en því er dreift yfir kökuna.
  • Skreytið kökuna með berkinum af lime.
    • Raspið lime, gætið þess að  að taka aðeins börkinn.
DSC_0829

Léttþeytið rjómann.

 

DSC_0831

Blandið skyrinu, pálmasykrinum og limesafanum saman við rjómann.

 

 

DSC_0819

Setjið múslíið í botninn á forminu.

 

 

DSC_0822

Bræðið súkkulaðið yfir vatnsbaði.

 

DSC_0826

Raspið börkinn af lime.

 

DSC_0834

Dreifið súkkulaðinu og limberkinum yfir kökuna.

Léttþeyttur rjómi

Fyrir nokkrum árum síðan var ég í heimsókn hjá sænskri kunningja konu minni á fallegri eyju í sænska skerjagarðinum. Með kaffinu bauð hún upp á dýrindis eplaköku, sem hún bar fram með rjóma. Það verður að segjast eins og er að þrátt fyrir að kakan væri mjög góð, var það samt sem áður rjóminn sem stóð upp úr. Ég hafði bara aldrei smakkað eins góðan þeyttann rjóma. Auðvitað spurði ég hana hver væri galdurinn á bak við rjómann? Ekki var það flókið, engu var bætt út í hann. Aðeins þurfti að þeyta rjómann á mjög lágum hraða í hrærivél. Jú það tekur töluvert lengri tíma heldur en að setja allt á fullt í stutta stund. Eftir þessa heimsókn hef ég aldrei notað aðra aðferð og margir haft orð á því hversu góður þeytti rjóminn væri hjá mér. En ég veit þó að sumum finnst nóg um hávaðan í hrærivélinni. Eitt sinn þegar ég var að hræra rjóma í veislu þar sem allir lögðu hönd á plóginn. Kom röggsöm kona inn í eldhús gekk hröðum skrefum að hrærivélinni og setti hana á fullt. Hún bara nennti ekki þessum hávaða.  Í þeirri veislu fékk engin að bragða á léttþeytta rjómanum.

Njótið.

Athugasemdir

athugasemdir

You Might Also Like