Hafraklattar með glúteini og glúteinlausir hafraklattar

Svo lengi lærir sem lifir, þessi málsháttur á við mig í eldhúsinu um þessar mundir. Eftir að við hjónin fórum í gegnum mataræðisprógramið okkar góða, kom það í ljós að Rúnar maðurinn minn er með glúteinóþol. Já einn af þeim. Það var sem sé glúteinið sem var búið að plaga minn mann í ofboðslega mörg ár. Í gegnum árin  vorum við svo sem búin að prófa hitt og þetta í eldhúsinu, til að bæta líðan hans. Rúnar var meðal annars búinn að taka út mjólkina fyrir mörgum áratugum, takmarka neyslu á glúteini, en tók það svo sem aldrei algjörlega út og að sjálfsögðu forðumst við sykur. Hann sjálfur hélt að sykurinn væri meinvaldurinn. En allt kom fyrir ekki. Þegar Rúnar var að taka aftur inn fæðuflokka eftir prógramið kom það strax í ljós að glúteinið væri meinvaldurinn. Í fyrstu var hann ekki viss og vildi prófa aftur. Rúnar gleypir sko ekki við öllu. Hann gerði það, jú glúteinið var ekki að gera honum gott. Eftir að hafa prófað þrisvar sinnum játaði Rúnar sig sigraðan og nýtt glúteinlaust líf hófst.

Mér fannst þetta nú ekki mikið mál með glúteinið, enda til eitt og annað glúteinlaust mjöl. Rauk út í næstu heilsuverslun og verslaði nokkra poka af mjöli. Hófst ég nú handa í glúteinlausa eldhúsinu. Óð í verkið án þess að lesa mér til. Hefði betur átt að byrja á því, þá hefði minna farið í safnhauginn í garðinum.

Von var á gestum í kaffiboð, glúteinlaus súkkulaðikaka var bökuð, hún leit svo sem ágætlega út en var frekar þurr. Slapp fyrir horn með miklum rjóma. Næst var það glúteinlaus hjónabandsæla, fjölskyldan gaf henni nýtt nafn þurrkaka. Var svo sem ekki bragðvond en ég hef aldrei fengið þurrari köku og hún breyttist ekkert í þær tvær vikur sem það tók okkur að klára hana. Eftir að vera næstum búin að eyðileggja vöfflujárnið með glúteinlausu vöffludeigi sá ég að hugsanlega þyrfti ég að lesa og læra um eðli glúteinlausa mjölsins. Fór í það.

Í glúteinlausa eldhúsinu fór ég þá leið að breyta þeim uppskriftum sem ég var vön að baka.  Glútein hafraklattarnir hafa verið í miklu uppáhaldi hjá okkur á Njálsgötunni í nokkur ár. Við krossuðum fingur um að þeir glúteinlausu heppnuðust. Sem betur fer gekk það upp og verða þeir hér eftir  bakaðir glúteinlausir.

Hafraklattar

Með glúteini.

Ég fékk 19 stk. úr uppskriftinni.

Stillið ofninn á 200°C

Innihald:

• 1 bolli lint smjör.
• 1 bolli pálmasykur.
• 2 stk.  egg.
• 1 ½ plata 56% súkkulaði gróft saxað.
• ½ bolli gróft saxaðar kasjúhnetur.
• ½ bolli gróft saxaðar möndlur með hýði.
• ½ bolli rúsínur.
  • Ég nota lífrænar.
•  3 bollar  haframjöl.
  • Ég nota lífrænt.
• 1 ¼ bollar fínt eða gróft spelt.
  • Eða bæði.
    • Ég nota lífrænt.

• 1 tsk vínsteinslyftiduft.
• ½ tsk salt.
• ½ tsk kanill.
• 2 tsk vanilluduft.

Aðferð:

•  Smjörinu og pálmasykrinum hrært mjög vel saman í hrærivél.
• Bætið eggjunum út í einu og einu og hrærið vel.
• Á meðan vélin vinnur saxið þá niður hneturnar, súkkulaðið og rúsínurnar.
• Bætið því út í deigið og blandið vel saman.
  • Í hrærivélinni.

• Bætið síðan spelti, haframjöli, vínsteinsdufti, kanil og vanilludufti saman við.
• Hrærið saman í stutta stund þar til allt hefur blandast vel saman.
• Mótið kúlur úr deiginu og þrýstið létt ofan á.
  • Góð stærð er á við gamla góða tómatinn.
• Bakað við 200°C í 8- 9 mínútur.

Uppskriftirnar eru nánast eins fyrir utan aðeins minna mjöl og ég bætti einu brúnu eggi við þá glúteinlausu.

Glúteinlausir hafraklattar

Ég fékk 19 stk. úr uppskriftinni.

Stillið ofninn á 200°C

Innihald:

• 1 bolli lint smjör.
• 1 bolli pálmasykur.
• 3 stk  egg.
• 1 ½ plata 56% súkkulaði gróft saxað.
• ½ bolli gróft saxaðar kasjúhnetur.
• ½ bolli gróft saxaðar möndlur með hýði.
• ½ bolli saxaðar rúsínur.
  • Ég nota lífrænar.
•  3 bollar glúteinlaust haframjöl.
  • Ég nota lífrænt.
    • Fæst í heilsubúðum.
• 1 bolli bókhveiti.
  • Ég nota lífrænt.
• 1 tsk vínsteinslyftiduft.
• ½ tsk salt.
• ½ tsk kanill.
• 2 tsk vanilluduft.

Aðferð:

• Hrærið mjög vel saman í hrærivél smjörinu og pálmasykrinum.
• Bætið eggjunum út í einu og einu og hrærið vel.

• Á meðan vélin vinnur saxið þá niður hneturnar, súkkulaðið og rúsínurnar.
• Bætið því út í deigið og blandið vel saman.
  • Í hrærivélinni.

• Bætið síðan bókhveiti, glúteinlausu haframjöli, vínsteinsdufti, kanil og vanilludufti saman við.
• Hrærið saman í stutta stund þar til allt hefur blandast vel saman.
• Mótið kúlur úr deiginu og þrýstið létt ofan á.
  • Góð stærð er á við gamla góða tómatinn.
• Bakað °við 200°C í 8- 9 mínútur.

Njótið.

 

 

 

Athugasemdir

athugasemdir