Ís inn

Ís er í MJÖG miklu uppáhaldi hjá fjölskyldunni. Þegar ég var að kynnast Rúnari manninum mínum hafði ég aldrei hitt aðra eins ísætu.  Hann fékk sér einn pakka af ís á hverju einasta kvöldi (líter). Mér fannst hann heldur ódannaður þegar hann var að gæða sér á ísnum. Ég var vön því úr mínum föðurhúsum að fólk fengi sér ís úr skál og borðaði fallega. Nei, nei það gerði Rúnar ekki. Með sælubros á vör tók hann tók pappann utan af ísnum, stakk gaffli í hann og nagaði heilan líter. Nú kann einhver að spyrja tók pappann utan af ísnum? Já á þessum árum var ís pakkað í pappa. Nei, nei það eru ekki 100 ár síðan, bara rétt rúmlega þrjátíu.

En eins og ”sannri kærustu„ er lagðið tókst mér að eyðileggja þessa venju Rúnars. Og þegar ég hugsa til baka, tókst mér líklega að eyðileggja ánægjuna af kvöld ísátinu. Sé aðeins eftir því. En sem betur fer hefur mér tekist að bæta honum það margfallt upp með þessum ÍS, sem ég hef gert við hátíðleg tækifæri í ýmsum útgáfum frá fyrstu jólunum okkar saman.

a hjá fjölskyldunni  sem þessi ís slær í gegn. Hann gerir það líka hjá þeim sem hafa fengið að njóta hans í boðum hjá okkur. Eftir jólaboðið á annan í jólum fékk ég þennan póst  frá einni frænkunni .

Sæl, mín kæra. Ég bara get ekki hætt að hugsa um ísinn frá því í gær (og reyndar ekki laxinn heldur). Er séns á að fá uppskrift að ísnum svo ég geti reynt að gera eins fyrir gamlárs?

Að sjálfsögðu fékk frænkan uppskriftina.

Það góða við ísgerðina er að hún tekur ekki meira en þrjátíu mínútur + frágang. Hægt er að útbúa ísinn fyrir hádegi og gæða sér á honum að kvöldi. Áður er ég eignaðist sérstök ísform notaði ég margskonar ílát undir ísinn s.s. kökuform eða glerskál.

 

Súkkulaði lakkrís ís

Þessi uppskrift dugir fyrir 10 – 12 manns. 

Innihald:

• 1 l rjómi
• 10 stk eggjarauður
• 150 g pálmasykur
• 300 g suðusúkkulaði
•  1 – 2 msk lakkrísduft frá Johan Bulow (fæst í Epal)
• Tengdasonur minn benti mér á að til væri sælgætis lakkrísduft sem hægt væri að nota í staðinn.

 

Aðferð:

• Bræðið 150 g af suðusúkkulaði yfir vatnsbaði og kælið
• Þeytið rjómann.
• Geymið hann í annari skál (skolið skálina).
• Þeytið eggjarauðurnar og pálmasykurinn mjög  vel saman. (Tekur 10 mínútur).
• Blandið rjómanum og eggjablöndunni  varlega saman með sleikju.
• Brytjið 150 g af suðusúkkulaði
• Blandið varlega saman  við rjómablönduna (með sleikju ) lakkrísduftinu, brædda og brytjaða súkkulaðinu.
• Frystið í góðu formi eða skál.

Ísinn er ofboðslega góður með  heitri súkkulaðisósu og ferskum jarðarberjum. 

Heit súkkulaði sósa

Tekur 4 mínútur að útbúa

Innihald:

• 1/2 dl rjómi
• 150 g suðusúkkulaði

Aðferð:

• Brætt saman við lágan hita og hrærið stöðugt í á meðan súkkulaðið er að bráðna.

 

                                                                                                                                                                                

Í þessari fjölskyldu er allur tími ís tími.

Þeir sem eru mikið fyrir marenstertur ættu endilega að baka eina slíka úr eggjahvítunum.

Athugasemdir

athugasemdir